कोहलपुर, मंसिर १९,
बाह्रखरी कथा प्रतियोगिता २०८१ मा प्रथम भएको सुखद अवसरमा हाम्रो पूर्णिमा साहित्य प्रतिष्ठान कोहलपुरले सम्मान कार्यक्रमको आयोजना गर्दै बधाई ज्ञापन गरेको हो । कोहलपुरको गौरव बढाउन सफल भएको भन्दै प्रतिष्ठानले भव्य कार्यक्रमको आयोजना गर्दै सम्मान गरेको हो । यस वर्षको डिसहोम बाह्रखरी कथा प्रतियोगितामा प्रथम पुरस्कार (रु १०००००) जित्न सफल कथाकार पादुकालाई पुष्पगुच्छासहित प्रमाण पत्र प्रदान गरिएको छ ।
डिसहोम र बाह्रखरीको आयोजनामा भएको कथा प्रतियोगितामा देश विदेशका ९३६ बढी कथाकारलाई पछि पार्दै कोहपुरका कथाकार पादुकाको ‘माग्युद खोना’ कथाले वर्ष ०८१ को प्रथम स्थान प्राप्त गर्न सफल भएको हो । हाम्रो पूर्णिमा साहित्य प्रतिष्ठान कोहलपुरका अध्यक्ष पुष्कर रिजालको अध्यक्षतामा भएको कार्यक्रममा नेपाल प्रज्ञा प्रतिष्ठानका प्राज्ञ महानन्द ढकाल प्रमुख अतिथी रहेका थिए । प्रमुख अतिथी ढकालले बाँकेलाई राष्ट्रिय स्तरमा चिनाउने स्रष्टाहरू कोहलपुरले पाउनु गर्वको विषय रहेको बताएका छन् ।
कार्यक्रममा बाह्रखरी कथा प्रतियोगिता २०८१ मा प्रथम कथा ‘माग्युद खोना’ को वाचन संचारकर्मी कल्पना कार्कीले गरेकी थिईन् । कथामा डोल्पा जिल्लाको भौगोलिक अवस्था, बा नभएका एकल आमाले हुर्काएका सन्तानका बारेमा चित्रण गरिएको छ । एकल आमाले हुर्काएका बच्चाहरुले भोग्नु परेका समस्या, चुनौती, अफ्ठेराहरु, तथा पञ्जीकरण सम्बन्धिका समस्या, नागरिकता लिनुका समस्या र विद्यालय भर्ना हुनुपर्दाका चुनौती र समाधान गर्नका लागि गरिएको कठोर सम्झौताकाबारेमा कथा लेखिएको छ ।
कार्यक्रमको समापन गर्दै कथाकार पादुकाले आफूले सधैं साहित्य सिर्जना गरिरहने तथा पत्रपत्रिकामा छापिरहने बताएका छन् । साहित्य मार्फत समाजमा समस्या तथा चुनौतिहरुलाई बाहिर ल्याईरहेको बताएका थिए । कार्यक्रमको समापन गर्दै प्रतिष्ठानका अध्यक्ष रिजालले पादुका अध्यनशिल तथा मेहनती साहित्यकारका रुपमा आफूले चिनेका बताएका छन् । उनले आगामी साहित्यिक यात्रा पनि सफल रहने विश्वास व्यक्त गरेका छन् । कार्यक्रममा यस क्षेत्रका साहित्य प्रेमी, संचारकर्मीहरुको सहभागिता रहेको थियो । कार्यक्रमको संचालन प्रतिष्ठानका सचिब केशव निमेषले गरेका थिए ।
