कोहलपुर, मंसिर २२,
राष्ट्रिय स्वतन्त्र पार्टी (रास्वपा) बाँकेको जिल्ला भेला सम्पन्न भएको छ ।
भेलाले खाली रहेका पदमा सदस्यहरु मनोनयन गरेको छ । रास्वपामा खाली रहेका पदहरु सचिब, सह–सचिब र सदस्यहरु निर्बाचन प्रकृयामार्फत सर्वसम्मत रुपमा निर्वाचित भएका हुन् । सचिब राजेन्द्र कुमार श्रेष्ठ, सह–सचिब बिनोद अग्रहरीका साथै अन्य ५ पाँच जना सदस्यहरु निर्वाचित भएका हुन् ।
हरी पाल सिंह केसीको सभापतित्वमा भएको जिल्ला भेलामा सभापति तथा उपसभापति रुद्रमणी ढकाल यथावत रहेका छन् । सदस्यहरुमा राम बहादुर विष्ट, ईश्वरी लामिछाने, शिव कुमार थारु, कृष्ण बहादुर खत्री लगायतका निर्वाचित भएका हुन् । रास्वपाले शनिबार कर्णाली, लुम्बिनी, गण्डकी र बागमती प्रदेशका पाँच जिल्लामा भेला आयोजना गरेको थियो । रास्वपाले पार्टीको संगठन निर्माणका लागि जिल्ला भेला आयोजना गरेको हो ।
शनिबार बाँके, सल्यान, नवलपुर, नुवाकोट र भक्तपुरमा जिल्ला भेला सम्पन्न भएका छन् । भेलाले पार्टीको संशोधित विधानको साङ्गठनिक संरचनाअनुसार जिल्ला समिति गठन, संगठन निर्माण, यसअघि जिल्ला समिति संरचना रहेको जिल्लामा रिक्त पदहरूको पदपूर्ति गरेको छ ।
रास्वपाले यसअघि देशभरका २३ जिल्लामा जिल्ला भेला सम्पन्न गरिसकेको छ ।
