कोहलपुर, माघ १०,
बाँके लगायत विभिन्न तराईका जिल्लाहरुमा हुस्सु कुहिरो लाग्दै आएको छ ।
गएको पुष महिनादेखि केही बाहेक प्राय दिनमा बाक्लो हुस्सु र कुहिरो लागिरहेको छ । पश्चिम र मध्य तराईका केही भू–भागमा बिहानैदेखि कुहिरो÷हुस्सुका साथै शीतलहर चल्दै आएको छ । शुक्रबारसम्म हुस्सु र कुहिरो लाग्ने सम्भावना छ । शनिबारदेखि भने विस्तारै कम हुने अनुमान महाशाखाको रहेको जल तथा मौसम विज्ञान कार्यालय कोहलपुरका प्रमुख राम प्रसाद अवस्थीले बताएका छन् ।
बाँके लगायत तराई क्षेत्रमा लुम्बिनी प्रदेशका अधिकांशमा जिल्लामा बाक्लो हुस्सु लाग्दै आएको छ । अवस्थीले भने,–‘वायुमण्डलमा पारदर्शिता पनि एकदमै कम छ । पछिल्लो समय ५० मिटरसम्म पनि भिजिविलिटी घटेको अवस्था छ । दिउँसोतिर पनि १५०० मिटर भन्दा बढ्न नसकेको अवस्था छ ।’
शनिबारदेखि मुख्य तया न्यूनतम तापक्रम घट्ने तथा मेक्सिमम टेम्प्रेचर बढ्दै जान सक्ने सम्भावना रहेको अवस्थीले बताए । तराईमा बाक्लो हुस्सु लागिरहदा पहाडी क्षेत्रहरूमा पनि सामान्य मौसम बदलिएको अवस्था रहेको उनले बताए । उनका अनुसार बिहानी पख हुस्सु लाग्ने दिउँसोदेखि क्रमिक रुपमा सुधार हुने अवस्था रहेको छ ।
शितलहर र हुस्सुका कारण अत्याधिक चिसो बढेको छ । अत्याधिक चिसोका कारण यहाँको जनजीवन प्रभावित बनेको छ । शितलहर र हुस्सुले गर्दा चिसो धेरै बढेपछि दैनिक कामकाज गर्नसमेत समस्या पर्दै आईरहेको छ भने जनजीवन अस्तव्यस्त बनेको छ । चिसो, हुस्सु तथा शितलहरका कारण सवारीसाधन र मानिसको आवागमन, बालबालिकाहरुको पठनपाठन र वृद्धवृद्धाहरुमा समस्या देखिएको छ । चिसोबाट मजदुरहरुको दैनिक कामसमेत प्रभावित हुँदै आएको छ ।
शितलहर, कुहिरो र भिजीविलिटी कम भएका कारण तीन दिनयता बिहान र बेलुका नेपालगन्जबाट हुने अधिकांश हवाई उडान प्रभावित हुँदै आएका छन् । तराई क्षेत्रमा बाक्लो हुस्सु लागेकोले सडक र हवाई यातायात गर्दा सतर्कता अपनाउन जल तथा मौसम विज्ञान कार्यालय कोहलपुरले अपिलसमेत गरेको छ ।
