कोहलपुर, फागुन ११,
मानव वन्यजन्तु द्धन्द्ध न्युनिकरण र वैकल्पिक जीविकोपार्जन प्रवद्र्धनका लागि स्थानीय पर्यटन उद्यमीहरुका अवसर सुदृढिकरणका लागि कार्यशाला गोष्टि शनिबार सम्पन्न भएको छ ।
बाँके राष्ट्रिय निकुञ्जको आयोजनामा तथा Zoological Society Of London Nepal -ZSL Nepal_ र इन्रुडेक कोहलपुरको साझेदारीमा स्थानीय पर्यटन उद्यमीहरूको अवसर सुदृढीकरणका लागि कार्यशाला गोष्ठीको आयोजना गरिएको हो । बाँके राष्ट्रिय निकुञ्जका प्रमुख विरेन्द्र कंडेलको अध्यक्षतामा भएको कार्यक्रममा संघीय सांसद माननिय सुर्य ढकाल प्रमुख अतिथी रहेका थिए ।
कार्यक्रममा बाँके राष्ट्रिय निकुञ्जका वरिष्ठ संरक्षण अधिकृत कंडेलले निकुञ्ज तथा मानव–वन्यजन्तु बीचको द्वन्द्व न्यूनीकरण गर्दै मध्यवर्ती क्षेत्रका बासिन्दाहरूको जीवनस्तर उकास्न वनमा आधारित व्यवसाय प्रवद्र्धन गर्न निकुञ्ज कार्यालय प्रतिबद्ध रहेको बताए । विशेषगरी पाटे बाघ संरक्षणका लागि स्थापना गरिएको निकुञ्जको प्रचार–प्रसार गर्दै समग्र पर्यटन व्यवसायलाई अघि बढाउन आफूहरू तयार रहेको बताएका छन् । कार्यक्रमका प्रमुख अतिथि ढकालले आफ्नो निर्वाचन क्षेत्रमा पर्ने बाँके राष्ट्रिय निकुञ्जको पर्यटन विकासका लागि केन्द्र सरकारसँग सक्दो पहल गर्ने प्रतिबद्धता जनाए । साथै, स्थानीय स्तरमा निकुञ्जको महत्वबारे थप प्रचार–प्रसार गर्नुपर्ने आवश्यकता औंल्याए ।
इन्रुडेक बाँकेका अध्यक्ष धर्मलाल रोकायाले मानव–वन्यजन्तु द्वन्द्व न्यूनीकरणका लागि स्थानीय तहहरूले जीविकोपार्जनसम्बन्धी विभिन्न तालिम, छलफल, सीप विकासलगायत कार्यक्रमहरूमा जोड दिनुपर्ने बताए । पूर्वमन्त्री तथा लुम्बिनी प्रदेश सभा सदस्य माननीय कृष्णा केसी (नमूना) ले थोरै लगानीमा पनि पर्यटन व्यवसाय सञ्चालन गर्न सकिने हुँदा सम्भावनाहरू खोजी गरी प्रवद्र्धन गर्नुपर्ने विचार राखिन् । त्यस्तै, प्रदेश सभा सदस्य माननीय बसन्ती न्यौपाने अधिकारीले निकुञ्ज आसपासका होमस्टेहरूमा स्थानीय उत्पादनलाई जोड दिई रैथाने भाषा, कला, संस्कृतिको प्रवद्र्धन गर्नुपर्ने बताइन् ।
राप्तीसोनारी गाउँपालिका अध्यक्ष तप्त पौडेल र नरैनापुर गाउँपालिका अध्यक्ष मो. इस्तीयाक अहमद साहले पर्यटन विकासका लागि आवश्यक बजेट विनियोजन गर्न गाउँपालिकाहरू तयार रहेको जनाए । पर्यटन विकास परिषद् लुम्बिनी प्रदेशका कार्यकारी निर्देशक रामु जोशीले नीतिगत तहमा बाँके राष्ट्रिय निकुञ्ज प्रवद्र्धन गर्न परिषद् प्रतिबद्ध रहेको जानकारी दिए । कार्यक्रममा जनप्रतिनिधिहरू, पर्यटन व्यवसायी, मध्यवर्ती क्षेत्र उपभोक्ता समिति, सामुदायिक वन तथा सरोकारवाला निकायका २०० भन्दा बढी सहभागी थिए । कार्यक्रमको संचालन पत्रकार कपिल अञ्जानले गरेका थिए ।
