कोहलपुर, फागुन १६,
बाँकेको कोहलपुरमा संचालन हुन लागेको तेस्रो मुख्य मन्त्री कोहलपुर गोल्डकप २०८१ को सम्पूर्ण तयारी पुरा भएको छ ।
फागुन १७ गते दिउँसो १ बजे उद्घाटन हुने गोल्डकपको तयारी सबै पुरा भएको आयोजकले जनाएको छ । तेस्रो मुख्य मन्त्री कोहलपुर गोल्डकपमा राष्ट्रिय तथा अन्तराष्ट्रिय गरि ८ वटा टिमको सहभागिता रहने छ । गोल्डकपको उद्घाटन खेलमा कोहलपुर रेसिङ साहरा फुटबल क्लब र लुम्बिनी फुटबल एकेडेमी घोराही बिच खेल हुनेछ ।
खेलको दोस्रो दिन साहरा फुटबल क्लब भारत र राईजिङ्ग स्टार फुटबल क्लब नवलपरासी बिच खेल हुने आयोजकले जनाएको छ । तेस्रो खेलमा प्लानिङ्ग ब्वाईज युनाईटेड क्लब काठमाण्डौ र राईनो फुटबल क्लब गण्डकी प्रदेश बिच प्रतिष्पर्धा हुनेछ भने अन्तिम खेल अफ्रिकन राष्ट्र घाना फुटबल क्लब र काक्रेबिहार फुटबल क्लब सुर्खेत आमने सामने हुनेछन् ।
फाईनल खेल फागुन २४ गते दिउँसो ३ बजे हुनेछ । फुटबल अवलोकन गर्न आउने दर्शकहरुका लागि ५० रुपैया टिकटको व्यवस्थापन गरिएको छ ।
