बिधुत्मा रैका, कोहलपुर, असार २२,
बाँकेका कैयौं नागरिकहरुले हिउँदका साना हुन् या वर्खाका ठुला, खोला–नालाहरु पैदल नै पार गर्नुपर्ने अवस्था थियो । तर अब समय बदलिँदैछ । जिल्लाभर फैलिएका पुल निर्माण परियोजनामार्फत यी खोल्साका गाउँहरूलाई पुल पारी र वारीको जीवनसँग जोड्न थालेको छ । जसको प्रभाव आवतजावतमा सहज भैरहेको छ । बाँके जिल्लामा पछिल्लो एक वर्षमा सम्पन्न र निर्माणाधीन पुलहरूले यात्राको शैली नै फेरीन थालेको छ । पुलहरु निर्माण भएका खोलामा पानी बढ्दा आवत जावतका लागि पर्खिनु पर्दैन । नदी, खोल्सा र बाढीले टुक्रिएको बाँकेको भूगोल अब पुलमार्फत बिस्तारै एकअर्कासँग जोडिँदैछ । यही योजनाअन्तर्गत आर्थिक वर्ष २०८१/८२ मा नौवस्ता–मनकामना, परस्पुर–गौघाट, बैजनाथ–बैरवा लगायतका स्थानहरूमा बहुप्रतिक्षित पुलहरू निर्माण सम्पन्न भएका छन् ।
भने केही पुलहरु निर्माणको चरणमा छन् । यसको गतिलो उदाहरणका रुपमा लिन सकिन्छ जिल्लाका विभिन्न स्थानहरुमा निर्माण भैएका पक्कीपुलहरु । लुम्बिनी प्रदेशको भौतिक पूर्वाधार विकास मन्त्रालयअन्तर्गत बाँके जिल्लामा विभिन्न स्थानमा पुलहरू निर्माण भैरहेका छन् । नौवस्ता–मनकामना सडकखण्डमा पर्ने जेठीखोला वनखेत पुल ४ करोड २ लाख सम्झौता अनुसारको लागतमा सम्पन्न भएको छ ।
यसैगरी, खजुरा र जानकी जोड्ने परस्पुर–गौघाट सडकमा किरण नाला पुल निर्माण सम्पन्न भई ५ करोड ५७ लाख रुपैयाँ बराबरको संरचना तयार भइसकेको छ । खजुरा–३ स्थित बि गाउँदेखि धौलागिरी आदर्श स्कुल हुँदै कपास विकास जोड्ने गडगैँचा नाला पुल ७ करोड ४५ लाख रुपैयाँ लागतमा निर्माण सम्पन्न गरिएको हो । बैजनाथ गाउँपालिका–४ मा पर्ने मनमाया चुनाको घरदेखि बैरवा जोड्ने सडकमा निर्माण गरिएको जेठीनाला सडक पुल पनि ५ करोडभन्दा बढी रकममा सम्पन्न भएको हो । यी सबै पुलहरूले स्थानीय यातायात सहज बनाएको छ ।
त्यसैगरी, जिल्लाका विभिन्न स्थानहरूमा हाल केही पुलहरू निर्माणाधीन अवस्थामा रहेका छन् । नेपालगञ्जको विशालचोक हुँदै जानकी गाउँपालिका र खजुरा गाउँपालिका जोड्ने मार्गमा पर्ने किरणनाला सडक पुलको निर्माण ५ करोड २६ लाख रुपैयाँ लागतमा भइरहेको छ । खजुरा गाउँपालिका–४ को सिर्जन टोल र जानकी गाउँपालिका–४ जोड्ने अर्को किरणनाला पुल पनि ४ करोड ६१ लाख रुपैयाँ लागतमा निर्माणाधीन छ । पिप्रीहवा, जयसपुर, शाहीगाउँ र राधापुर जोड्ने किरणनाला पुलको निर्माण ५ करोड रुपैयाँभन्दा बढीमा भइरहेको छ भने सिमलघारी–गिजरा–उडरापुर सडकमा निर्माण भइरहेको जेठीनाला पुल ८ करोड रुपैयाँको लागतमा बनिरहेको छ । त्यस्तै, राप्ती–सोनारी ९ को अर्गानिक क्षेत्रदेखि तल्लो खैरेनीसम्मको सडकमा पुल निर्माण कार्य पनि ५ करोड रुपैयाँभन्दा बढीमा भइरहेको छ ।
प्रदेश सरकारले तीव्र गतिमा पूर्वाधार निर्माणलाई प्राथमिकता दिएको छ । पुल निर्माणले जिल्लाभित्रको सडक सञ्जाल बलियो बनाउने तथा बाढी तथा खोल्साबाट जनजीवनलाई सुरक्षित राख्नेछ । पूर्वाधार सडक विकास कार्यालय बाँकेका निमित्त प्रमुख दीपक खड्का भन्छन्,–‘हामीले बाँकेको भौगोलिक चुनौतीलाई ध्यानमा राखी खोल्साहरूमा मजबुत र दिगो पुल निर्माणमा प्राथमिकता दिएका छौँ । सम्पन्न भएका पुलहरूले स्थानीयको जीवन सहज बनाएको देखिएको छ । अब बाँकेका सडक तथा पुल निर्माणले नयाँ गती लिएको छ ।’ स्थानीय नागरिकहरुले खोलाको भेल र जोखिमका कारण सेवा पाउन घण्टौं कुर्नुपर्ने बाध्यता अब क्रमशः हट्दै गएको उनको भनाइ छ ।
