कोहलपुर, फागुन १६,
नेपाल कम्युनिस्टका तर्फबाट बाँके क्षेत्र नम्बर १ की समानुपातिक उम्मेदवार मन्जु कोईरालाले आफ्नो पार्टीले आगामी निर्वाचनमा विजय हासिल गर्ने दाबी गर्दै समग्र विकासमा प्रतिबद्ध रहेको बताएकी छन् ।
कोइरालाले विकास, सुशासन र सामाजिक न्यायलाई प्राथमिकतामा राखेर अघि बढ्ने बताइन् । उनले भनिन्,-‘हामी जनताको विश्वास जित्ने आधार तयार गरिसकेका छौं । शिक्षा, स्वास्थ्य, कृषि र पूर्वाधार विकासलाई सशक्त बनाउँदै लैजानु हाम्रो प्रमुख एजेन्डा हो ।’ उनले विशेषगरी महिलाको सशक्तिकरणलाई आफ्नो मुख्य प्राथमिकता बनाएको उल्लेख गरिन् । महिलालाई आर्थिक रूपमा आत्मनिर्भर बनाउने कार्यक्रम, सीपमूलक तालिम, स्वरोजगारका अवसर र नेतृत्व विकासका पहलहरूलाई विस्तार गरिनेछ कोइरालाको भनाइ थियो ।
उनले बाँकेको ग्रामीण भेगमा खानेपानी, सडक स्तरोन्नति, सिँचाइ तथा कृषि आधुनिकीकरणका कार्यक्रमलाई तीव्रता दिने प्रतिबद्धता व्यक्त गरिन् । साथै युवालाई रोजगारी सिर्जना गर्ने योजना ल्याइने र स्वास्थ्य संस्थामा आवश्यक जनशक्ति तथा पूर्वाधार व्यवस्थापन गरिने बताइन् ।
पार्टीप्रति जनताको समर्थन बढ्दो रहेको दाबी गर्दै समानुपातिक प्रणालीमार्फत योग्य र प्रतिबद्ध नेतृत्व संसदमा पुग्ने विश्वास व्यक्त गरिन् । उम्मेदवार कोइरालाले लोकतान्त्रिक प्रक्रियामा सक्रिय सहभागिता जनाउन सबै मतदातालाई आग्रह गर्दै समावेशी र दिगो विकासका लागि आफ्नो पार्टीलाई समर्थन गर्न अपिल गरेकी छन् ।
