कोहलपुर, साउन १०,
दक्षिण सुडानस्थित संयुक्त राष्ट्रसंघीय शान्ति मिसन (UNMISS) का फोर्स कमान्डरले नेपाल र थाइल्यान्डका २४ महिला सहित ४५५ जना शान्ति सैनिकलाई उत्कृष्ट सेवाको कदरस्वरूप संयुक्त राष्ट्रसंघ (UN) पदक प्रदान गरेका छन्।
सेप्टेम्बर २०२५ देखि दक्षिण सुडानमा तैनाथ उक्त शान्ति सैनिकहरूले हालसम्म १,६०० भन्दा बढी परिचालन गतिविधि सम्पन्न गरेका छन्। उनीहरूले स्थानीय समुदायको सुरक्षा सुदृढ गर्न नियमित गस्ती सञ्चालन गर्नुका साथै महत्वपूर्ण सडक तथा अन्य पूर्वाधारको सुधार, साथै लेक्स (Lakes) र वाराप (Warrap) राज्यका समुदायहरूको आवतजावत र पहुँच सहज बनाउन उल्लेखनीय योगदान दिएका छन्।
UNMISS ले शान्ति स्थापना, नागरिकको सुरक्षा तथा स्थानीय समुदायको जीवनस्तर सुधारमा पुर्याएको समर्पित योगदानको सम्मानस्वरूप उनीहरूलाई संयुक्त राष्ट्रसंघ पदकबाट सम्मानित गरिएको जनाएको छ। नेपाल र थाइल्यान्डका शान्ति सैनिकहरूको व्यावसायिकता, अनुशासन र समर्पणको प्रशंसा गर्दै UNMISS ले उनीहरूको आगामी सेवायात्राका लागि समेत शुभकामना व्यक्त गरेको छ।
