कोहलपुर, साउन १४,
कोहलपुर नगरपालिकाले आर्थिक रूपमा कमजोर तथा विपन्न नगरवासीहरूलाई लक्षित गरी आवास निर्माण वा जीर्ण घर मर्मतका लागि अधिकतम एक लाख रुपैयाँसम्मको आवास ऋण सहायता उपलब्ध गराउने भएको छ ।
कोहलपुर नगरपालिका, लुमन्ती संस्था र एनएमबी बैंकको सहकार्यमा सञ्चालनमा ल्याइएको ‘आवास निर्माण कार्यक्रम’ अन्तर्गत आवासविहीन, जीर्ण घरमा बसोबास गरिरहेका, वा आर्थिक अभावका कारण घर मर्मत गर्न नसक्ने नगरवासीहरूलाई सहयोग प्रदान गरिनेछ । नगरपालिकाका अनुसार वडा नं. १ देखि १५ सम्मका सबै वडाध्यक्षहरूलाई कार्यक्रमबारे औपचारिक सूचना पठाइसकिएको छ । नगर कार्यपालिकाको कार्यालयद्वारा पठाइएको सूचनामा भनिएको छ कि ब्याजदर ७ वर्षसम्म स्थिर रहने भएकाले ऋण लिने व्यक्तिमा अतिरिक्त आर्थिक भार नपर्नेछ ।
नगर प्रमुख प्रशासकीय अधिकृत मानबहादुर गिरीले हस्ताक्षर गर्नुभएको सूचनामा उल्लेख छ,
यो कार्यक्रमले साना आम्दानी भएका नागरिकहरूलाई स्वाभिमानपूर्वक जीवनयापन गर्न सहयोग गर्नेछ । यस कार्यक्रमले सामाजिक समावेशीता, समानता, शिक्षा, स्वास्थ्य र सुरक्षामा समस्या भोगिरहेका परिवारहरूलाई दीर्घकालीन राहत दिने अपेक्षा गरिएको छ । निवेदन दिने अन्तिम म्याद साउन महिनाको मसान्तसम्म तोकिएको छ, र नगरवासीहरूलाई समयमा आवेदन दिन अनुरोध गरिएको छ ।
तस्बिर बिकल भट्टराई
